Konur og stjórnmál
Vefurinn Konur og stjórnmál er hluti af verkefni Landsbókasafns Íslands – Háskólabókasafns í tilefni þess að árið 2015 eru 100 ár frá því að Danakonungur staðfesti stjórnarskrárbreytingu sem fól í sér að konur og vinnumenn, 40 ára og eldri, fengu kosningarétt til Alþingis.
Verkefnið er unnið með styrk frá Framkvæmdanefnd um 100 ára afmæli kosningaréttar kvenna og í samvinnu Landsbókasafns við Alþingi, RIKK – Rannsóknarstofnun í jafnréttisfræðum við Háskóla Íslands, RÚV og Þjóðskjalasafn Íslands.
Vefnum er ætlað að rekja sögu kosningaréttar íslenskra kvenna og fjalla um stjórnmálaþátttöku kvenna ásamt því að gera kvennabaráttu og jafnréttisbaráttu kvenna skil.
Vefurinn er í þróun en fyrst um sinn er lögð áhersla á að rekja sögu kosningaréttar kvenna á tímalínu ásamt því að fjalla um brautryðjendur í jafnréttisbaráttu kvenna. Einnig eru birtir undirskriftarlistar þar sem konur um land allt skoruðu á Alþingi að breyta stjórnskipunarlögum á þann hátt að konur fengju kosningarétt.
Brautryðjendur
Hvaða einstaklingar mótuðu baráttuna? Umfjöllun um brautryðjendur kvennabaráttunnar.
Áskoranir til Alþingis
Íslenskar konur söfnuðu undirskriftum og skoruðu á Alþingi að veita konum kosningarétt og rétt til kjörgengis.
Ritaskrá
Skrár yfir rit um konur og jafnréttismál.
Sagan
Baráttan fyrir kosningarétti og kjörgengi í máli og myndum.
Saga kosningarréttar kvenna
Þegar íslenskar konur fengu kosningarétt árið 1915 birtust í Vísi og Morgunblaðinu þann 20. júní 1915 tilkynningar á forsíðum um að skeyti hefði borist landritara þess efnis að stjórnarskrá Íslands hefði verið undirrituð og konungsúrskurður gefinn um íslenskan fána.
Ekki var getið um kosningarétt kvenna í þessum tilkynningum.
Þann 21. júní 1915 birti Morgunblaðið svo grein eftir Elendínus með fyrirsögninni Kosningaréttur.
Á þingsetningardaginn 7. júlí 1915 héldu Kvenréttindafélag Íslands og Hið íslenska kvenfélag hátíð til að fagna nýfengnum kosningarétti kvenna. Íslensk blöð sögðu frá hátíðahöldunum og þann 10. júlí birti Morgunblaðið stutta grein eftir Elendínus með fyrirsögninni Einkennileg tilviljun.
Í Vísi þann 10. júlí 1915 og Heimskringlu þann 26. ágúst 1915 var fjallað um fjölgun kjósenda eftir stjórnarskrárbreytingarnar 1915 þar sem konur fengu kosningarétt.
Afmælisárið 2015
Sýningin Vér heilsum glaðar framtíðinni í Þjóðarbókhlöðu
Sýningin Vér heilsum glaðar framtíðinni var hluti af verkefni Landsbókasafns Íslands – Háskólabókasafns í tilefni af 100 ára afmæli kosningaréttar kvenna.
Sýningin í Þjóðarbókhlöðunni stóð frá 16. maí 2015 til 20. mars 2016.
Við opnun sýningarinnar var vefurinn Konur og stjórnmál settur í loftið.
Það voru félagar í Femínistafélagi Háteigsskóla sem sáu um opnunina með því að klippa á borða sem sérstaklega var búinn til fyrir þetta tilefni. Sjá frétt á mbl.is
Kallað eftir skjölum kvenna
Árið 2015 fögnuðu landsmenn 100 ára afmæli kosningaréttar kvenna. Af því tilefni efndi Landsbókasafn Íslands – Háskólabókasafn, Þjóðskjalasafn Íslands og héraðsskjalasöfnin til þjóðarátaks um söfnun á skjölum kvenna og hvetja landsmenn til að afhenda þau á skjalasöfn. Bréf, dagbækur og önnur persónuleg gögn geta veitt innsýn inn í líf einstaklinga og fjölskyldna þeirra en einnig varpa þau ljósi á sögu lands og þjóðar.
Viðburðir
Viðburðir í tilefni af 100 ára afmæli kosningaréttar kvenna.
Í tilefni af 100 ára afmæli kosningaréttar kvenna var margvísleg dagskrá í boði um land allt. Upplýsingar um viðburðina eru á vef Framkvæmdanefndar um 100 ára afmæli kosningaréttar kvenna (http://kosningarettur100ara.is/).
Vakin er sérstök athygli á:
Alþjóðlegri ráðstefnu í Hörpu dagana 22. – 23. október 2015 sem bar yfirskriftina Borgaraleg réttindi kvenna í 100 ár.
Hátíðarfundi Alþingis þann 19. júní 2015 sem var í beinni útsendingu í sjónvarpi og útvarpi.
Upptaka af fundinum.
Þann 19. júní 2015 var Athöfn á Austurvelli til heiðurs konum.
Þá var einnig Dagskrá RÚV í öllum miðlum RÚV sem tileinkuð var afmælinu ásamt beinum útsendingum frá hátíðahöldunum.