Í apríl 1888 birtist grein í Þjóðviljanum þar sem þingeyskar konur skora á ísfirskar konur að slást með sér í lið og safna undirskriftum fyrir Þingvallafund um haustið.
Í áskoruninni var þess krafist:
- „Að konur fái jafnan rétt við karlmenn í fjárráðum.“
- „Að konur hafi óskoraðan rétt til allra menntastofnana, sem kostaðar eru af landsfé.“
- „Að konur hafi rétt til allra embætta í landinu og annarar atvinnu með sömu skilyrðum og karlmenn.“
- „Að konur hafi kosningarrétt og kjörgengi til allra opinberra starfa með sömu takmörkunum og karlmenn.“
Á fundinn bárust áskoranir frá 73 konum úr Ísafjarðarsýslu og 27 úr Þingeyjarsýslu. Skúli Thoroddsen og Pétur Jónsson lásu áskoranir kvennanna upp.
Skúli Thoroddsen, Hannes Hafstein og Pjetur Jónsson voru kosnir í nefnd um málið og að tillöögu þeirra samþykktu fundarmenn að skora á Alþingi að „gefa málinu um jafnrétti kvenna við karla, sem mestan gaum“ með því að:
- „samþykkja frumvarp, er veitir konum í sjálfstæðri stöðu kjörgengi í sveita- og safnaðarmálum“
- „að taka til rækilegrar íhugunar, hvernig eignar- og fjárráðum giptra kvenna verði skipað svo, að rjettur þeirra gagnvart bóndanum sé betur tryggður en nú er“
- „að gjöra konum sem auðveldast að afla sér menntunar“
Á Þjóðskjalasafni má sjá uppkast þremeninganna um málið.
Ítarefni:
- ÞÍ. (Þjóðskjalasafn Íslands) Skjalasafn alþingis D/31. Þingvallafundur 1888
- Þjóðviljinn, 26. apríl 1888, 70-71
- Þjóðviljinn, 6. september 1888, 107
- Sigríður Th. Erlendsdóttir, Veröld sem ég vil: Saga Kvenréttindafélags Íslands 1907-1992 (Reykjavík: Kvenréttindafélag Íslands 1993) bls. 42