Ólafía Jóhannsdóttir (1863–1924) einn af stofnendum Hins íslenska kvenfélags 1894 og Hvítabandsins 1895. Hún barðist fyrir stofnun Háskóla Íslands. Hún var fulltrúi kvenna á Þingvallafundinum 1895.

Þar var henni ætlað að ræða fjögur mál: kvenréttindamálið, háskólamálið, stjórnarskrármálið og bindindismálið.

Ólafía ritstýrði tímaritinu Framsókn á árunum 1899–1901 (ásamt Jarþrúði Ólafsdóttur) en einnig barnablaðinu Æskunni árið 1899 og Ársriti hins íslenska kvenfélags árin 1895 til 1897 og 1899.

Ólafía var jafnframt fyrsta íslenska konan til að gefa út sjálfsævisögu árið 1925.

Ítarefni:

• Sigríður Dúna Kristmundsdóttir, Ólafía Jóhannsdóttir: ævisaga Ólafíu Jóhannsdóttir. (Reykjavík: JPV útgáfa 2006)
• Ólafía Jóhannsdóttir, Frá myrkri til ljóss: æfisaga. (Akureyri: Athur Gook 1925)
• Þóra Kristín Ásgeirsdóttir, „Fyrstu íslensku súffragetturnar“, Alþýðublaðið 11.mars 1997
• Wikipedia

Theodóra Thoroddsen (1863–1954) var skáld og kvenréttindakona.

Hún fæddist í Dölunum og var dóttir Guðmundar Einarssonar og Katrínar Ólafsdóttur Sívertsen.

Hún útskrifaðist úr Kvennaskólanum í Reykjavík árið 1879 og giftist Skúla Thoroddsen árið 1884.

Þulur eftir hana voru fyrst gefnar út árið 1916 en ýmis kvæði, sögur og stökur höfðu verið birtar annars staðar, eins og til dæmis í Mánaðarriti Lestrarfélags kvenna í Reykjavík. En hún sat jafnframt um tíma í stjórn Lestrarfélagsins.

Hún tók virkan þátt í kvenréttindabaráttu á Íslandi og var í 4. sæti á Kvennalistanum sem bauð fram til Alþingis árið 1922.

Ítarefni:

• Freyja Jónsdóttir, „Vonarstræti 12“, Morgunblaðið 19. mars 2002, bls. 30-31
• Helga Kress, „Theodóra Thoroddsen 1863-1954“,  Stúlka. Ljóð eftir íslenskar konur. Bókmenntafræðistofnun Háskóla Íslands, Reykjavík 2001, bls. 160
• Skald.is
• Theodóra Thoroddsen, Þulur, 1916
• „Vonarstræti 12“, Reykjavík bókmenntaborg UNESCO 
• Wikipedia

Einkaskjöl Theodóru Thoroddsen eru varðveitt á handritasafni.

Camilla Torfason (fullt nafn: Petrine Thora Camilla Stefánsdóttir Torfason) (1864–1927) lauk fyrst íslenskra kvenna stúdentsprófi. Það var frá Trier  menntaskólanum í Kaupmannahöfn 1889. Hún lauk kandidatsprófi í heimspeki við Kaupmannahafnarháskóla ári síðar. Hún stundaði síðan nám í stærðfræði í tvö ár, en lauk ekki prófi heldur sneri sér að kennslustörfum. Hún var stofnandi og fyrsti forstöðumaður Kvenfélagsins Óskar á Ísafirði árið 1907.

Ítarefni:

• Morgunblaðið 4. mars 1937, bls. 4
• Ártöl og áfangar í sögu kvenna, bls. 32
• Morgunblaðið 2. desember 1987

Ingibjörg  H. Bjarnason (1867–1941) var fyrsta íslenska konan til að taka sæti á alþingi. Hún sat á Alþingi 1922–1930 fyrir Kvennalistann (eldri), Íhaldsflokkinn, Sjálfstæðisflokkinn. Ingibjörg starfaði sem kennari og skólastjóri Kvennaskólans í Reykjavík í mörg ár og var formaður Landspítalasjóðs sem stóð að byggingu Landspítalans.

Í tilefni af 100 ára kosningarafmæli kvenna árið 2015 var afhjúpuð stytta af Ingibjörgu við Alþingishúsið. Styttan er sú fyrsta af nafngreindri konu í allri Reykjavíkurborg. Sjá þáttinn Grjótharðar úr þáttaröðinni Öldin hennar (RÚV).

„Konur eru þó fullur helmingur allra kjósenda á landinu. Ættu konur að íhuga það vel, að rjettur sá, er íslenskar konur öðluðust árið 1915, er svo mikilsverður, að þær geta, með því að nota hann til fulls, haft úrslitaáhrif á öll þau mál, sem þær láta tíl sín taka“.

Ítarefni:

• Alþingi
• Eyrún Ingadóttir, „Hugsjónir og veruleiki: störf Ingibjargar H. Bjarnason á alþingi 1922-1930“ Kvennaslóðir (Reykjavík : Kvennasögusafn Íslands 2001) bls. 340-353
• Ingibjörg H. Bjarnason,„Fimtardómur hinn ‘forni og konurnar.“ Lögrétta, 26.júní 1930 bls. 15-16
•  Kjartan Magnússon, „Einingartákn og merkisberi íslenskra kvenna“  SunnudagsMogginn 30. október 2011, bls. 34-35
• Kristín Ásgeirsdóttir, „Fyrst  kvenna á þing. Erindi flutt í Alþingishúsinu 8. Júlí 2012 í tilefni af því að þann dag voru 90 ár liðin frá því að Ingibjörg H.Bjarnason var kjörin á þing fyrst kvenna“ Jafnréttisstofa
• Kristín Ástgeirsdóttir, „Fyrst kvenna á Alþingi: gagnrýni á Ingibjörgu H. Bjarnason“, Fléttur 2 (Reykjavík : Rannsóknastofa í kvenna- og kynjafræðum við Háskóla Íslands 2004) bls. 171-189
• Wikipedia 

Einkaskjalasöfn Ingibjargar H. Bjarnadóttur eru varðveitt á Kvennasögusafni.

Ingibjörg Skaptadóttir (1867–1945)

Hún gaf út og ritstýrði mánaðarritinu Framsókn árin 1895-1899 ásamt móður sinni Sigríði Þorsteinsdóttur.

Ingibjörg var einn af stofnendum og fyrsti formaður fyrsta kvenfélagsins á Seyðisfirði.

Ítarefni:

• Auður Aðalsteinsdóttir, „Á réttri hillu – fyrstu íslensku blaðakonurnar“ Spássían, vor 2011.

Kristín Eggertsdóttir (1877–1924) var fyrsta konan sem kosin var í bæjarstjórn á Akureyri.

Hún var menntuð úr Kvennaskólanum á Laugalandi og var við nám í Noregi árið 1905–1907.

Kristín starfaði um tíma við kennslu og varð síðan forstöðukona Sjúkrahússins á Akureyri árið 1907.

Kristín var kosin í bæjarstjórn Akureyrar árið 1911 af sérstökum kvennalista.

Listinn hlaut 17% atkvæða og sat Kristín í bæjarstjórn í þrjú ár. Í bæjarstjórnartíð sinni sat hún í kjörstjórn, skólanefnd og fátækranefnd.

Eftir að hafa verið í bæjarstjórn snéri hún sér að því að reka greiðasölu. Árin 1913–1914 var hún í Englandi og Danmörku og eftir það rak hún hótel á Oddeyri.

Hún tók virkan þátt í kvenfélaginu Hlíf og gaf fé til að styrkja konur til náms.

Ítarefni:

• „Bæjarstjórnarkosning“, Norðurland 7. janúar 1911, bls. 4
• Kvennasögusafn
• „Kvenréttindakonan Kristín Eggertsdóttir“, Vera 1. ágúst 1991, bls. 2